Sobre los Grupos Bíblicos Unidos

L’Asamblea d’Estudiantes del Milán quier llamar l’atención ente una organización relixosa, Grupos Bíblicos Unidos (GBU), que pasó’l mes de payares nel aulariu A del nuesu campus cola intención de sacar perres pa una supuesta campaña de solidariedá cola infancia. Hemos dicir na so defensa que contaben col sofitu y l’autorización d’un miembru competente del gobiernu de la facultá.

Entós, ¿por qué l’Asamblea d’Estudiantes del Milán s’encara a esto? Los GBU nin son una organización relixosa normal nin tan ideolóxicamente preparaos pa formar parte d’una universidá. Estos centros d’estudios carauterícense por tener un puntu de vista materialista y científicu de los estudios cosa que nun se pué dicir precisamente de los GBU.

Esta organización relixosa, llegalizada como ONG, ta vinculada direutamente y por estatutos col movimientu evanxelista, una seuta cristiana que pasa inalvertida pero que ye de lo más escuro que podemos alcontrar en tanto en cuanto a lo qu’a la negación de la ciencia y del llibrepensamientu se refier.

L’evanxelismu surdió nel sieglu XVIII baxo la máxima del “vivir en Dios” y, polos estatutos públicos de GBU, estos en particular podíen metese na estaya de los más fanáticos, nel conocíu como fundamentalismu cristianu. Esta corriente ñega la fiabilidá de la ciencia, l’evolucionismu, la cosmovisión plenamente argumentada que caltienen la totalidá de los homes y muyeres de ciencia anguaño, considera a la Biblia como “infalible” y cai na dogmatización total y absoluta de la fe cristiana, recibiendo incluso crítiques de ser una organización de cálter paraeclesiásticu. Analizando los sos documentos públicos baxo los criterios del caderalgu de filosofía la Universidá Pontificia de Salamanca Ildefonso Murillo tamos ente un grupu netamente fundamentalista. Ensin llugar a duldes.

Otres organizaciones, pensadores y congregaciones estatales enteres de la redolada ideolóxica llegaron a lexitimar la Guerra d’Iraq como una cruzada relixosa, a considerar que los xudíos son condición indispensable pa la fin de la hestoria (conozse esta ideoloxía como sionismu cristianu, los siguiores piensen que cuando los xudíos lleguen a Tierra Santa y reconstruyan el Templu de Xerusalén va precipitase l’Apocalipsis y la xusticia ganará sobro la maldá cola tercera venida de Cristu) o incluso que Dios conderga a los actores de cine y teatru por facese pasar por otres persones. Tamién consideren que ye corrupción humana lleer, ver o escuchar too aquello que nun seya revisao enantes por un Pastor ¡ya incluso que la muyer cristiana debe llevar velu por orden bíblica!

Por too esto, l’Asamblea d’Estudiantes del Milán quier amosar la so más enérxica protesta ente l’estudiantáu d’humanidaes y les instituciones competentes pa refugar esta clas d’actividaes que faen bandera de fanatismu y sectarismu, porque la universidá nun ye nin sitiu pa la inorancia nin llugar pa los enemigos del progresu de la humanidá.